Fyrr í dag fór fram opnunarleikur heimsmeistaramóts karla þar sem að Filippseyjar mættu Túnis. Mótið fer fram á Filippseyjum og var því mikið um dýrðir á þessum fyrsta leik mótsins.
Filippseyjar 0-3 Túnis (13-25, 17-25, 23-25)
Fyrir leik voru heimamenn taldir ólíklegir til afreka en áttu þó fínustu skorpur í leik dagsins. Túnis vann fyrstu tvær hrinur leiksins auðveldlega en sú þriðja var í járnum. Að lokum vann Túnis með minnsta mun og sótti því 0-3 sigur í fyrsta leik. Bryan Bagunas skoraði 23 stig fyrir heimamenn en hjá Túnis var Oussama Ben Romdhane atkvæðamestur með 17 stig.
Eftir stuttan opnunardag mótsins fer allt á fullt um helgina en alls fara fram átta leikir á morgun, laugardag. Þar má helst nefna leik Þýskalands og Búlgaríu. Vert er að nefna að vegna tímamismunar hefst fyrsti leikur keppnisdagsins klukkan 2 eftir miðnætti.
Leikir morgundagsins – Laugardagur 13. september
- Bandaríkin – Kólumbía 02:00
- Kanada – Líbía 02:30
- Kúba – Portúgal 05:30
- Japan – Tyrkland 06:00
- Þýskaland – Búlgaría 09:30
- Holland – Katar 10:00
- Slóvenía – Síle 13:00
- Pólland – Rúmenía 13:30
