Undanúrslit héldu áfram í úrslitakeppni Íslandsmóts karla í kvöld. Afturelding var 1-0 yfir gegn KA og Þróttur Reykjavík leiddi 1-0 gegn deildarmeisturum Hamars.
Afturelding gerði sér lítið fyrir og vann KA í fyrsta leik liðanna sem fram fór á Akureyri. Norðanmenn voru hins vegar í miklu stuði í upphafi leiks í dag og náðu fljótt afgerandi forystu. Afturelding minnkaði muninn undir lok hrinu en KA hélt út og náði 0-1 forystu. Önnur hrina var hnífjöfn en um miðja hrinu seig KA fram úr og náði 0-2 forystu.
Heimamenn í Aftureldingu náðu sér betur á strik í þriðju hrinu en þó var hún jöfn framan af. Frábær lokakafli tryggði Aftureldingu öruggan sigur og Mosfellingar komnir inn í leikinn. Þeir bættu um betur og unnu einnig fjórðu hrinuna á sannfærandi hátt. Úrslitin réðust því í oddahrinu, líkt og í fyrsta leiknum á Akureyri. Í þetta skiptið var KA sterkari aðilinn og því fer einvígið í oddaleik. Sá leikur fer fram föstudaginn 10. apríl næstkomandi en leikið verður í KA-heimilinu.
Afturelding 2-3 KA (21-25, 19-25, 25-17, 25-18, 10-15)
Líkt og í einvígi KA og Aftureldingar náði Þróttur Reykjavík í útisigur gegn Hamri í fyrsta leik. Hamar byrjaði þó betur í kvöld og leiddi framan af fyrstu hrinu. Jafnt var fyrir lokakaflann en þá skoruðu heimamenn 6 stig í röð og tryggðu sér 1-0 forystu. Um algjöra einstefnu var að ræða stærstan hluta annarrar hrinu en Þróttur náði mest 13 stiga forskoti. Þróttarar sigldu þægilegum sigri heim þrátt fyrir öllu meiri mótspyrnu Hamars í seinni hluta hrinunnar.
Hamar mætti af krafti inn í þriðju hrinu og náði strax þægilegu forskoti. Dæmið snerist við um miðja hrinu og allt var hnífjafnt þar til á lokakaflanum. Þar reyndust Þróttarar sterkari eftir mikla spennu og Þróttur Reykjavík tryggði sér því 3-0 sigur og jafnframt sigur í einvíginu. Þróttur er því fyrra liðið til að tryggja sig í úrslitaeinvígið og bíður eftir sigurvegara oddaleiks KA og Aftureldingar.
Þróttur Reykjavík 3-0 Hamar (25-18, 25-18, 25-23)
