Íslensku stelpurnar í U17 léku sinn fyrsta leik í dag þegar þær mættu Færeyjum á Evrópumóti Smáþjóða.
Íslenski hópurinn ferðaðist til Írlands í gær og kom sér vel fyrir í Dublin. Keppni fór svo af stað í dag en íslensku stelpurnar voru lengi í gang. Færeyjar leiddu 7-14 í fyrstu hrinu þegar Ísland vaknaði loks. Íslensku stelpurnar minnkuðu muninn í 12-14 og varð seinni hluti hrinunnar jafn og spennandi. Ísland vann 25-22 sigur og náði forystu í leiknum. Önnur hrinan var enn jafnari og þurfti upphækkun til að útkljá um sigurvegara þar. Í þetta sinn unnu Færeyjar 29-31 og staðan orðin jöfn 1-1.
Ísland gerði vel í þriðju hrinu og leiddi allt frá upphafi. Íslensku stelpurnar voru heilt yfir mun betri og unnu öruggan 25-19 sigur. Þær kórónuðu svo flottan leik með 25-13 sigri í fjórðu hrinu og Ísland vann leikinn 3-1.
Stelpurnar mæta næst liði Liechtenstein og hefst sá leikur klukkan 13:30 á morgun, þriðjudag. Um kvöldið hefst svo úrslitakeppni í mótinu en ekki er ljóst hvaða liði Ísland mætir þar.
