HM fjörið hélt áfram í dag með tveimur mjög svo áhugaverðum leikjum. Búlgaría mætti sprækum Portúgölum en Bandaríkin áttu hörkuleik við Slóveníu.
Búlgaría lék mjög vel í riðlakeppninni og vann þar sigra gegn sterkum liðum Þýskalands og Slóveníu. Þeir mættu Portúgal í fyrri leiki dagsins en þeir portúgölsku skildu Kúbu eftir í D-riðli. Búlgarar byrjuðu leikinn vel en Portúgal kom til baka í annarri hrinu. Það dugði ekki til og í kjölfarið valtaði Búlgaría yfir þá portúgölsku í þriðju hrinu. Búlgaría vann leikinn því sannfærandi og flýgur inn í 8-liða úrslitin.
Seinni leikurinn var viðureign Bandaríkjanna og Slóveníu. Bandaríkin unnu alla leiki sína í riðlinum en Slóvenía tapaði fyrir Búlgaríu í hörkuleik. Í dag byrjaði Slóvenía mun betur og vann fyrstu hrinu en eftir það gekk mun betur hjá bandaríska liðinu. Þeir náðu smám saman stjórn á leiknum og unnu að lokum sanngjarnan 3-1 sigur. Bandaríkin fara því áfram og mæta Búlgaríu í flottum leik.
Búlgaría 3-0 Portúgal (25-19, 25-23, 25-13). Alex Nikolov heldur áfram að raða inn stigum en hann skoraði 19 stig fyrir Búlgaríu. Lourenço Martins var stigahæstur hjá Portúgal með 10 stig.
Bandaríkin 3-1 Slóvenía (19-25, 25-22, 25-17, 25-20). Gabriel Garcia átti hörkuleik fyrir Bandaríkin og skoraði 25 stig, þar af 7 beint úr uppgjöf. Toncek Stern var stigahæstur hjá Slóveníu eins og oft áður en hann skoraði 18 stig í leiknum.
Búlgaría og Bandaríkin mætast í 8-liða úrslitum á fimmtudag. Sá leikur ætti að verða hörkuspennandi enda tvö af heitustu liðum mótsins til þessa að mætast. Á morgun halda 16-liða úrslitin hins vegar áfram og þar eru tvær ólíklegar viðureignir á dagskrá. Túnis mætir Tékklandi í fyrri leiknum og í hádeginu mætast svo Serbía og Íran.
Leikir morgundagsins – Þriðjudagur 23. september
Túnis – Tékkland 7:30
Serbía – Íran 12:00
