Einn leikur fór fram í Unbroken deild karla í dag þegar HK tók á móti Aftureldingu í Digranesi.
HK hafði fyrir leikinn aðeins unnið eina hrinu í fyrstu fjórum leikjum sínum og sátu því í áttunda og neðsta sæti Unbroken deildar karla með 0 stig. Afturelding voru hinsvegar í sjötta sæti fyrir leikinn með 3 stig eftir þrjá leiki.
Afturelding fóru vel af stað í leiknum og voru fljótt komnir í 6-1 þökk sé öflugum uppgjöfum frá uppspilara liðsins, Hubert Lasecki. HK komu sér hinsvegar inní leikinn og enn var þar uppspilari að verkum en sterkar uppgjafir Markúsar Freys Arnarssonar ullu Aftureldingu miklum vandræðum. Leikurinn var nokkuð jafn en fór svo að lokum að Afturelding hafði betur í fyrstu hrinu 25-17.
HK héldu áfram að láta Aftureldingu hafa fyrir hlutunum og var önnur hrina nokkuð jöfn og spennandi lengi vel en Afturelding reyndist þó sterkari aðilinn undir lokinn og fóru með sigur 25-18.
Bæði lið gerðu svo breytingar á byrjunarliðum sínum í þriðju hrinu og reyndist hún mun jafnari. Liðin skiptust á stigum og voru leikar jafnir í 21-21. Enn voru það gestirnir sem reyndust sterkari aðilinn undir lokinn og fóru þeir með sigur í þriðju hrinu 25-22 og vinna því leikinn 3-0.
HK – Afturelding 0-3 (17-25, 18-25, 22-25)
Afturelding fer því upp um eitt sæti eftir sigur kvöldsins og eru þá með 6 stig í 5.sæti deildarinnar. HK situr enn í neðsta sæti með 0 stig eftir 5 leiki.
